Өткен демалыс күндері Шоқан Уәлиханов атындағы жекеменшік мектепте ауқымды шара — Model United Nations (MUN), яғни Біріккен Ұлттар Ұйымының жұмысын білім беру форматында үлгілеу симуляциясы өтті.

Қала мектептерінен 130-ға жуық оқушы жиналып, нағыз дипломат рөлін сомдауға мүмкіндік алды.

MUN аясында қатысушылар түрлі мемлекеттердің өкілдері ретінде жұмыс істеп, БҰҰ комитеттері үлгісінде пікірталас жүргізді. Конференцияның басты тақырыбы — БҰҰ ұсынған Тұрақты даму мақсаттары (ТДМ) болды. Оқушылар кедейлікті жою, әлеуметтік теңсіздікті азайту және сапалы әрі инклюзивті білім беруді қамтамасыз ету мәселелерін талқылап, өзара шешімдер ұсынды.

Талқылауларда жасанды интеллектінің (ЖИ) кедейлікпен күрес пен әлеуметтік әділеттілікті қамтамасыз етудегі рөліне ерекше назар аударылды. Делегаттар технологияның ауыл мен қала арасындағы білім беру теңсіздігін азайтып, шалғай аймақтардағы оқушыларға заманауи білім ресурстарын ұсынудағы мүмкіндіктерін қарастырды.

Біздің оқушылар конференцияның негізгі номинацияларында жеңімпаз атанды:
Аюпова Индира — Үздік делегат,
Нұрлыбекова Милена — Үздік презентация,
Карим Меруерт — Ерекше делегат.
Қатысушыларымызды және өзге де номинанттарды шешендік өнері мен дипломатиялық қабілеттері үшін шын жүректен құттықтаймыз!

Шара мектеп пен SATisfaction оқу орталығының қолдауымен жоғары деңгейде өтіп, қатысушыларға жарқын әсер мен болашаққа шабыт сыйлады.

Осы мазмұнды әрі шабыттандыратын күндердің атмосферасына бірге үңілейік.